🙏🏻🙏🏻🙏🏻 มื้อนี้เป็นวันที่ ๑๒ สิงหาคม เป็นวันสำคัญยิ่ง เป็นอย่

มื้อนี้เป็นวันที่ ๑๒ สิงหาคม เป็นวันสำคัญยิ่ง เป็นอย่างได๋ว่าสำคัญ เป็นวันรำลึกถึงแม่ วันแม่แห่งชาติ ย่านพวกเฮาทั้งหลาย ลูกหลานเกิดมาบ่ฮู้จักพ่อบ่ฮู้จักแม่ เพิ่นก็เลยให้วันที่ ๕ ธันวา วันเกิดในหลวงรัชกาลที่ ๙ เป็นวันพ่อแห่งชาติ วันเกิดพระบรมราชินีพันปีหลวงรัชกาลที่ ๙ ก็เป็นวันแม่แห่งชาติ วันที่ ๑๒ สิงหา ก็ถือว่าเป็นวันมงคลมหามงคลอย่างยิ่งเป็นวันแม่แห่งชาติ

พวกเฮาเกิดมา ให้พวกเฮาถามเจ้าของ เฮาเกิดมาจากไส พวกเฮาทุกคนก็เกิดมาจากแม่ แม่เป็นบุพการี บุคคลผู้มีอุปการะก่อน พ่อแม่เป็นบุพการีของบุตรธิดา เพิ่นเปรียบเทียบว่า พ่อแม่เป็นพระอรหันต์ของบุตรธิดา บางคนก็มาถามหลวงพ่อ ถ้าหากเฮาเปรียบเทียบพ่อแม่ของเฮาเป็นพระอรหันต์นี่ สิบ่เปรียบเทียบสูงเกินไปบ่หลวงพ่อ เอ้าก็ฟังสุดถ้อยสุดคำดูสิ บ่แม่นสิว่าพ่อแม่ของเฮาเป็นพระอรหันต์ เพิ่นก็ไม่ได้ว่าอย่างซั่นเด้ เพิ่นบอกว่า พ่อแม่เป็นพระอรหันต์ของบุตรธิดา เป็นพระอรหันต์ของลูกสาวลูกชายของในครอบครัวนั้น เป็นหยังเพิ่นว่าเป็นพระอรหันต์ เพราะว่าคันเฮาทำผิดฆ่-าพ่อกับฆ่-าแม่ ในหลักของพุทธศาสนาเพิ่นบอกว่าอนันตริยกรรม การฆ่-าพ่อฆ่-าแม่คือกันกับการฆ่-าพระอรหันต์ จึงเปรียบเทียบว่าพ่อแม่เป็นพระอรหันต์ของบุตรธิดา บ่แม่นเป็นพระอรหันต์ของผู้อื่นเด้

พ่อแม่เป็นผู้ที่เลี้ยงลูกมาตั้งแต่อ้อนแต่ออก อย่างพวกเฮาเลี้ยงลูกเลี้ยงหลาน เฮาก็เป็นจังซั่นล่ะ แต่เป็นเด็กน้อยมีแต่เอาใจเจ้าของงอแง ร้องไห้ขี้แตกขี้ไหล พ่อแม่ก็เบิ่งแล้วเบิ่งอีก ล้างแล้วล้างอีก บาดฮาเป็นผู้ใหญ่ขึ้นมาบาดนี้ลืมตาอ้าปากได้ จะไปหาดูถูกพ่อแม่ว่าบ่มีบุญคุณ เผลอ ๆ ยังมาฮุบสมบัติพ่อแม่ ไล่พ่อแม่หนีออกจากเฮือนอีกต่างหาก บางคนนะ บ่แม่นทุกคนดอก นี่แหละ อันนี้เพิ่นว่าลูกอกตัญญู บ่รู้จักบุญคุณของพ่อของแม่

คันผู้รู้จักบุญคุณของพ่อแม่ที่เลี้ยงเฮามานี่ ทุกข์ยากลำบาก อดตาหลับขับตานอนยามเมื่อค่ำเมื่อคืน เฮาไข้เฮาป่วย พ่อแม่สิบ่ได้หลับได้นอน ดูแลลูก ยามลูกไข้ขึ้นก็ไปหามดหาหมอ กว่าเฮาสิใหญ่ถึงขนาดนี้ ในเมื่อเฮาใหญ่ขึ้นมาในระดับหนึ่ง เพิ่นก็ส่งไปเข้าโรงร่ำโรงเรียน พ่อแม่พยายามส่งลูกให้เรียนหนังสือสูงที่สุด พ่อแม่ดูแลประคบประหงมมาตั้งแต่เล็กแต่น้อย อันนี้หลวงพ่อเว้าให้พวกเฮาสังเกต มันแม่นบ่ ในเมื่อเฮาใหญ่ขึ้นมาแล้วบาดนี้ ได้รับปริญญาตรี ปริญญาโท ปริญญาเอก เฮาก็ลืมเจ้าของอีกว่ากูนี่แหละเรียนมา บ่แม่นพ่อแม่เรียนให้กู กูเรียนเอง ตามที่จริง ก่อนที่กูสิมาเรียนเองจังซั่น ไผเป็นผู้ส่งข้าวน้ำโภชนาอาหาร ตั้งแต่เอานมให้กินแต่ทีแรก ประคบประหงมแต่ทีแรกพุ่นน่ะ ค่าส่งค่าเล่าเรียนค่ารถค่าราแม่นไผล่ะ บาดฮาลืมเมิ๊ดจำนวนนั้น มาลืมว่าเจ้าของได้สติได้ปัญญา ข่มพ่อข่มแม่มันบ่แม่นเด้ เบิ่งพิจารณาดูเบิ่งให้คัก อันนี้หลวงพ่อย้อนให้ลูกหลานได้ยินได้ศึกษา หลวงพ่อเว้าให้คิด

ผู้ใดยังมีพ่อมีแม่อยู่ก็ให้เบิ่งพ่อเบิ่งแม่นะลูกหลานเน้อ ถ้าหากว่าพ่อแม่เสียชีวิตไปแล้วก็ทำบุญอุทิศส่วนกุศลให้เพิ่น สาธุเน้อ ผู้ข้านี่พ่อแม่เสียชีวิตไปแล้ว ดวงวิญญาณของพ่อของแม่สิงสถิตอยู่หม่องได๋ ขอให้ส่งบุญกุศลมื้อนี้ให้พ่อให้แม่ ให้มีความสุขความเจริญเน้อ ถ้าหากว่ามีทุกข์อยู่ก็ขอให้พ้นจากทุกข์ ถ้ามีความสุขอยู่แล้วขอให้มีความสุขยิ่ง ๆ ขึ้นเน้อ คุณพ่อคุณแม่เน้อ ให้นึกในใจจังซั่น

หลักของพุทธศาสนา เพิ่นว่าพ่อแม่เลี้ยงดูเรามาแล้ว เลี้ยงท่านตอบ ทำกิจธุระของท่าน ดำรงวงศ์สกุล ประพฤติตนให้สมควร ควรรับทรัพย์มรดก เมื่อท่านล่วงลับไปแล้ว ทำบุญอุทิศส่วนกุศลให้ท่าน อันนั้นเป็นหน้าที่ของพวกเฮาที่เป็นลูก พวกเฮาอยู่เบื้องหลัง บ่มีหยังจะตอบแทนเพิ่น เพิ่นไปแล้ว เฮามีแต่อุทิศส่วนกุศลกับส่งกระแสจิตกระแสใจไปให้เพิ่น ให้เพิ่นได้รับส่วนบุญส่วนกุศล อันนี้เป็นหน้าที่ของพวกเฮา

หลวงพ่ออินทร์ถวาย สันตุสสโก
จากพระธรรมเทศนา “หลวงพ่อไม่เคยลืมผู้มีพระคุณ”
แสดงธรรมเมื่อวันที่ ๑๒ สิงหาคม ๒๕๖๗

( – 2025-08-12 17:03:00———ข่าวอัพเดทจาก : เฟซบุ๊ค อุดรบอกต่อ———www.ด่วน.com อัพเดท ข่าวด่วน ข่าวร้อนประเด็นดังทุกภาคทั่วไทย 🇹🇭